Skoðið fjölda mynda af málverkum og listmunum  listamannanna sem sýna í Gallerí List hér á vefnum

Gler


Gler getur orðið til í náttúrunni þegar eldingu slær niður í sand eða við viss skilyrði i eldgosum. Grunnefnið í öllu gleri er sandur sem er bráðinn og snöggkólnar án þess að mynda krystalla. Rúðugler er ekki það sama og gler sem er notað við blástur eða það sem mótað er á einhvern hátt í skúlptúra. Rúðugler harðnar mjög fljótt og þess vegna er erfitt að móta það eða leika sér með það. Hægt er að bæta ýmsum efnum við glerið til að lengja þann tíma sem það tekur að harðna. Á tímabili var blý notað í það en það er ekki lengur gert í svo stórum stíl sem áður þar sem það getur haft mengandi áhrif á umhverfið.

Hægt er að lita gler með ýmsum aðferðum t.a.m. að blanda litnum í það á meðan það er heitt. Miserfitt þykir að ná fram hinum ýmsu litum og sem dæmi má nefna að erfitt þykir að ná fram appelsínugulu og rauðu en blár og gulur eiga að vera auðveldari. Aðrar aðferðir við að lita gler er hreinlega að mála það eftir að það hefur verið unnið í ofni og má þar nefna t.a.m. gyllingu sem sett er á eftir að glerhluturinn er tilbúinn.

Gler er hægt að setja í mót, en það er mjög erfið vinnsla á gleri, og verður að vinna inni í ofninum. Mótið er stundum gert úr gifsi og eftir að það hefur verið notað einu sinni verður að eyðileggja það með því að brjóta það utan af sjálfu glerinu.

Aðrar vinnsluaðferðir eru t.a.m. að pressa glerið í mót þannig að úr verða lágmyndir og einnig að blása glerið. Glerblástur krefst mikillar færni og einnig að yfirleitt komi þar fleiri að verki en einn.

Í gegnum tíðina hefur gler verið nýtt bæði sem nytjahlutir eins í vatnsglös, en einnig í skúlptúra þar sem listamaðurinn hefur leikið sér með formið og efnið og möguleika þess. Tékkneskir glerlistamenn eru meðal þeirra fremstu í heiminum við að móta gler í hin ótrúlegustu form og má benda á listamennina Stanislav Libensku og Jaroslava Brychtovà í því sambandi. Einnig hefur Bandaríkjamaðurinn Dale Chihuly gert magnaða skúltpúra úr gleri.

Ýtarefni um gler: Grove Art Online: www.groveart.com. Mamiya og Tansey, 2001, Gardner’s Art through the ages. Harcourt College Publishers, New York.